A investigación de CINTECX estará un ano máis na Noite Europea das Persoas Investigadoras participando nas actividades organizadas pola UVigo, o venres 26 de setembro no Edificio Redeiras, na praza do Berbés de Vigo.

O persoal investigador de CINTECX amosará os seus coñecementos a través das actividades:

🤖 Intelixencia artificial e simulación para a seguridade viaria

Pode unha intelixencia artificial detectar e explicar perigos na estrada? Nesta actividade as persoas que participen empregarán simuladores e IA para intentar dar resposta a esta pregunta e medir o nivel de seguridade na condución diaria.

PÚBLICO FAMILIAR PRIMEIRO ANDAR
GRUPO DE XEOTECNOLOXÍAS APLICADAS – CINTECX

⚡ Como xerar enerxía e eliminar contaminantes

Neste obradoiro poderás aprender a xerar H2 cunha pila ou incluso crear unha pila que acenda unha lámpada. Ademais experimentarás coas técnicas máis novidosas para a eliminación de contaminantes da auga.

PÚBLICO FAMILIAR TERCEIRO ANDAR
GRUPO BIOSUV – CINTECX

🧪 Materiais: ciencia ficción ou realidade?

Descubre o lado máis sorprendente dos materiais nun obradoiro cheo de enxeñaría, creatividade e experimentación. A través de dinámicas prácticas e exemplos reais, poderás aprender como se comportan distintos materiais baixo presión, torsión ou temperatura, e como estas propiedades son chave para deseñar estruturas resistentes, flexibles ou lixeiras.

PÚBLICO FAMILIAR EXTERIOR
ESCOLA DE ENXEÑARÍA DE MINAS E ENERXÍA

Baixo o lema “Conciencias creativas”, o evento, coordinado pola UVigo, achegará a ciencia ás rúas, museos, institucións educativas e bares. Coñece o programa completo en: Vigo – GNIGHT