Investigo sobre enxeñaría biomédica, concretamente o modelado numérico de tecidos biolóxicos, simulación de próteses e implantes, e desenvolvemento de técnicas para a análise biomecánica.
A investigación é o meu camiño para innovar e desenvolver solucións útiles para a sociedade. Explorar alternativas ao convencional e descubrir novas ferramentas que nos permitan resolver os desafíos actuais, sen temor ao descoñecido nin ao fracaso.
O meu traballo contribúe activamente ao desenvolvemento de novos dispositivos biomédicos empregados en cirurxía ou rehabilitación. Co modelado numérico de tecidos e os modelos de simulación somos capaces de comprobar o funcionamento das próteses antes de seren implantadas no paciente. Co desenvolvemento de técnicas e dispositivos para análise biomecánica somos capaces de dotar de ferramentas de medición e avaliación a rehabilitadores e profesionais deportivos.
Ás mozas diríalles que a investigación dálles a oportunidade de explorar novas ideas e cambiar a nosa realidade.
A edición deste calendario é posible grazas á ‘Axuda para a estrutura, a mellora e o apoio aos Centros de Investigación do Sistema Universitario Galego (CIGUS)’, cofinanciadas por Fondos Europeos no marco do programa operativo Feder Galicia 2021-2027.