Unha vintena de mozos e mozas participantes no programa Campus Camp visitaron hoxe as instalacións do Centro de Investigación en Tecnoloxías, Enerxía e Procesos Industriais (CINTECX) para coñecer de primeira man a actividade científica que se desenvolve no centro. Durante a xornada, os rapaces e rapazas, con idades comprendidas entre os 12 e os 16 anos, participaron en diferentes obradoiros divulgativos deseñados para achegarlles o traballo investigador dunha maneira práctica, dinámica e participativa.
Ao longo da visita, os participantes percorreron distintos espazos do centro e tiveron a oportunidade de experimentar con fenómenos científicos e tecnolóxicos da man do persoal investigador de CINTECX.
A través de diferentes obradoiros como A aventura do hidróxeno verde, impartido por Marta Pazos Currás, investigadora do grupo BIOSUV, puideron aprender como funciona o proceso de electrólise para separar hidróxeno e osíxeno empregando enerxía solar, descubrindo así o potencial deste vector enerxético como alternativa sustentable para o futuro.
A ciencia tamén amosou a súa faceta máis espectacular en Dracarys, un obradoiro dirixido polos investigadores David Rodiño e César Álvarez, do grupo GTE, no que os participantes puideron observar e comprender diferentes procesos de combustión a través de experimentos prácticos.
Pola súa banda, o investigador Félix Quintero, do grupo LASERON, axudou a resolver unha das preguntas máis habituais da ciencia: Por que o ceo é azul? A través de demostracións sinxelas e visuais, os asistentes descubriron como interactúa a luz coa atmosfera e os fenómenos físicos que explican a cor do ceo.
Así mesmo, as investigadoras Teresa Rivas, María Pazo e Laura Andrés, do grupo GESSMIN, impartiron o Miniobradoiro de minerais, onde os rapaces e rapazas puideron coñecer algúns dos minerais presentes en obxectos e dispositivos de uso cotián, como os teléfonos móbiles, e comprender a importancia destes materiais nas tecnoloxías actuais.
A visita converteuse nunha das citas máis agardadas da programación de Campus Camp e supón o segundo ano consecutivo no que CINTECX abre as súas instalacións aos participantes deste programa estival, achegándolles a actividade investigadora desenvolvida en ámbitos como a enerxía, os materiais, a óptica ou os procesos industriais. Con esta iniciativa, os visitantes poden descubrir de primeira man como é o traballo científico e o papel que desempeña a investigación no desenvolvemento de tecnoloxías e solucións para a sociedade.
Estas actividades están cofinanciadas con Fondos Europeos no marco do programa operativo Feder Galicia 2021-2027.
