{"id":265502,"date":"2026-11-10T22:21:02","date_gmt":"2026-11-10T21:21:02","guid":{"rendered":"https:\/\/cintecx.uvigo.es\/?p=265502"},"modified":"2026-11-10T22:21:02","modified_gmt":"2026-11-10T21:21:02","slug":"cintecx-bate-record-de-participacion-na-sua-vii-xornada-de-ciencia-aberta-con-preto-de-700-asistentes","status":"publish","type":"post","link":"https:\/\/cintecx.uvigo.es\/gl\/cintecx-bate-record-de-participacion-na-sua-vii-xornada-de-ciencia-aberta-con-preto-de-700-asistentes\/","title":{"rendered":"Cintecx bate r\u00e9cord de participaci\u00f3n na s\u00faa VII Xornada de Ciencia Aberta con preto de 700 asistentes"},"content":{"rendered":"

A VII Xornada de Ciencia Aberta Cintecx 2026 pechou a s\u00faa edici\u00f3n m\u00e1is multitudinaria ata o momento. Preto de 700 persoas participaron ao longo do venres 6 de novembro<\/strong> nas actividades organizadas polo Centro de Investigaci\u00f3n en Tecnolox\u00edas, Enerx\u00eda e Procesos Industriais da Universidade de Vigo, que este ano sa\u00edu por primeira vez das s\u00faas instalaci\u00f3ns para levar a s\u00faa investigaci\u00f3n ao Tinglado do Porto de Vigo<\/strong>.<\/p>\n

Baixo o lema Investigaci\u00f3n que conecta a t\u00faa cidade, a xornada reuniu durante todo o d\u00eda a estudantes, familias e p\u00fablico de diferentes idades arredor dunha programaci\u00f3n dese\u00f1ada para achegar a ciencia e a tecnolox\u00eda \u00e1 sociedade dun xeito pr\u00e1ctico, visual e participativo. <\/p>\n

M\u00e1is de 35 investigadores e investigadoras de CINTECX<\/strong> implic\u00e1ronse na iniciativa, mostrando a trav\u00e9s de stands, demostraci\u00f3ns e experiencias divulgativas parte da investigaci\u00f3n que desenvolven no centro.<\/p>\n

M\u00e1is de 250 estudantes participaron na busca do tesouro cient\u00edfica<\/strong><\/p>\n

Durante a ma\u00f1\u00e1, CINTECX recibiu a oito centros educativos procedentes de Vigo, A Guarda e Santiago de Compostela<\/strong>, reunindo a m\u00e1is de 250 estudantes de Secundaria e Bacharelato<\/strong>.<\/p>\n

Divididos en d\u00faas quendas, o alumnado participou nunha busca do tesouro cient\u00edfica que os levou a percorrer as diferentes propostas instaladas no Tinglado. Para conseguir os selos do seu pasaporte cient\u00edfico tiveron que superar actividades, experimentos e preguntas relacionadas coa investigaci\u00f3n desenvolvida no centro.<\/p>\n

Ao longo da ma\u00f1\u00e1 puideron descubrir, entre outras cuesti\u00f3ns, como o xeorradar, a intelixencia artificial e a realidade mixta<\/strong> permiten estudar o estado das infraestruturas; como as tecnolox\u00edas espaciais axudan a analizar os bosques; ou por que as bater\u00edas e o almacenamento de enerx\u00eda<\/strong> son fundamentais para aproveitar as fontes renovables. Tam\u00e9n experimentaron con termograf\u00eda infravermella, combusti\u00f3n, biomateriais, minerais, novos materiais ou simulaci\u00f3n de conduci\u00f3n.<\/p>\n

M\u00e1is de 445 persoas acheg\u00e1ronse \u00e1 ciencia durante a tarde<\/strong><\/p>\n

A partir das 17.00 horas, o Tinglado abriu as actividades a toda a cidadan\u00eda e rexistrou unha asistencia que superou as previsi\u00f3ns, con m\u00e1is de 445 persoas entre nenos, nenas, persoas adultas e familias<\/strong>. Entre os grupos asistentes estiveron tam\u00e9n membros da Asociaci\u00f3n Inventiva<\/strong> e do Centro Xuvenil Abertal<\/strong>.<\/p>\n

Durante tres horas, o p\u00fablico puido percorrer libremente os diferentes stands, experimentar con lapis de impresi\u00f3n 3D, probar experiencias de realidade virtual, descubrir o videoxogo Alerta Verde: Salva o teu centro coa misi\u00f3n Cintecx, aprender a identificar noticias falsas con Kill the Bulo ou experimentar co magnetismo e as sorprendentes propiedades dos materiais, entre outras propostas.<\/p>\n

A sesi\u00f3n de tarde contou tam\u00e9n con outros dous pases do show cient\u00edfico de Ceo Aberto<\/strong>, completando unha programaci\u00f3n que buscou demostrar que a ciencia e a enxe\u00f1ar\u00eda forman parte de moitos aspectos da vida coti\u00e1.<\/p>\n

O r\u00e9cord de participaci\u00f3n acadado nesta s\u00e9tima edici\u00f3n<\/strong> consolida a Xornada de Ciencia Aberta como unha das principais iniciativas de divulgaci\u00f3n de Cintecx e reforza a aposta do centro por achegar \u00e1 sociedade a investigaci\u00f3n desenvolvida nas s\u00faas diferentes \u00e1reas tecnol\u00f3xicas.<\/p>\n

A iniciativa conta co financiamento da Xunta de Galicia<\/strong> e dos fondos europeos Feder<\/strong>, no marco de Cintecx como centro colaborativo da Rede Cigus.<\/p>\n