{"id":259326,"date":"2025-10-06T14:50:08","date_gmt":"2025-10-06T12:50:08","guid":{"rendered":"https:\/\/cintecx.uvigo.es\/cintecx-de-vuelta-a-la-gnight-con-ciencia-aplicada-a-la-seguridad-vial-y-el-medioambiente\/"},"modified":"2025-10-07T17:19:17","modified_gmt":"2025-10-07T15:19:17","slug":"cintecx-de-vuelta-a-la-gnight-con-ciencia-aplicada-a-la-seguridad-vial-y-el-medioambiente","status":"publish","type":"post","link":"https:\/\/cintecx.uvigo.es\/gl\/cintecx-de-vuelta-a-la-gnight-con-ciencia-aplicada-a-la-seguridad-vial-y-el-medioambiente\/","title":{"rendered":"CINTECX de volta \u00e1 GNight con ciencia aplicada \u00e1 seguridade viaria e o medioambiente"},"content":{"rendered":"

DUVI
\nUn setembro m\u00e1is, e xa van cinco, a G-Night volveu levar \u00e1s r\u00faas e prazas de Galicia a ciencia e a creatividade para celebrar e encher de luz a Noite das Persoas Investigadoras. Esta iniciativa, que se desenvolve de xeito simult\u00e1neo en todo o planeta, busca sacar a investigaci\u00f3n dos laboratorios e achegala \u00e1 cidadan\u00eda, para que tanto nenos e nenas como persoas adultas poidan co\u00f1ecer, dun xeito l\u00fadico, entretido e sobre todo interactivo, o impacto real que a actividade cient\u00edfica e tecnol\u00f3xica ten na sociedade.<\/p>\n

Onde m\u00e1is se evidenciou o v\u00ednculo entre ciencia e cidadan\u00eda foi no Berb\u00e9s, en Vigo, xa que a s\u00faa praza e o edificio Redeiras foron o epicentro da G-Night coa celebraci\u00f3n da tradicional feira cient\u00edfica, nesta ocasi\u00f3n con unha trintena de obradoiros para todas as idades. O f\u00edo condutor da xornada foi a creatividade e a s\u00faa relaci\u00f3n co co\u00f1ecemento cient\u00edfico, baixo o lema Conciencias creativas<\/em>. A partir das cinco da tarde foron moitas as familias que se achegaron a esta zona da cidade para co\u00f1ecer, dun xeito interactivo, l\u00fadico e pr\u00f3ximo, diferentes li\u00f1as de traballo que desenvolven os grupos de investigaci\u00f3n da UVigo.<\/p>\n

Propostas punteiras en tecnolox\u00eda, sustentabilidade e seguridade<\/h3>\n

O Centro de Investigaci\u00f3n en Tecnolox\u00edas, Enerx\u00eda e Procesos Industriais (CINTECX) volveu participar activamente na G-Night, achegando a ciencia \u00e1 cidadan\u00eda con propostas innovadoras e experimentais. Investigadoras e investigadores do centro ofreceron actividades interactivas que combinaron tecnolox\u00eda de vangarda con retos sociais e medioambientais.<\/p>\n

Da man das investigadoras Aida D\u00edez Sarabia, Silvia Escudero Curiel e Ant\u00eda Fern\u00e1ndez Sanrom\u00e1n, do grupo BIOSUV, decenas de mozos e adultos participaron en experimentos pr\u00e1cticos para xerar hidr\u00f3xeno cunha pila e puideron co\u00f1ecer as t\u00e9cnicas m\u00e1is recentes para a eliminaci\u00f3n de contaminantes da auga. Unha experiencia que permitiu \u00e1s persoas asistentes comprender como a ciencia pode contribu\u00edr a un futuro m\u00e1is limpo e sostible.<\/p>\n

Por outra banda, para responder \u00e1 pregunta Pode unha intelixencia artificial detectar e explicar perigos na estrada?<\/em> Mario Soil\u00e1n Rodr\u00edguez, Ana S\u00e1nchez Rodr\u00edguez e Ant\u00f3n N\u00fa\u00f1ez Seoane, do grupo GEOTECH, presentaron a actividade \u201cIntelixencia Artificial e simulaci\u00f3n para a seguridade viaria\u201d, onde explicaron como estas tecnolox\u00edas poden reducir e previr accidentes de tr\u00e1fico. A proposta inclu\u00edu simuladores interactivos que atraeron a decenas de persoas, que fixeron cola para probalos e avaliar o seu nivel de seguridade na conduci\u00f3n diaria. A actividade espertou gran interese entre o p\u00fablico, que puido experimentar de primeira man como a IA pode converterse nunha aliada clave para salvar vidas.<\/p>\n

Ademais de CINTECX, a programaci\u00f3n da UVigo<\/a> inclu\u00edu obradoiros sobre evoluci\u00f3n molecular de virus, cambio clim\u00e1tico, investigaci\u00f3n aeroespacial, rob\u00f3tica, micropl\u00e1sticos, cosm\u00e9tica natural e novos materiais. Tam\u00e9n se celebrou un obradoiro art\u00edstico que fusionou ciencia e tecido artesanal para facer medrar unha ra\u00edz colectiva no interior do edificio Redeiras.<\/p>\n

En Galicia a programaci\u00f3n implicou m\u00e1is dunha ducia de instituci\u00f3ns baixo a coordinaci\u00f3n da Universidade de Vigo e comprendeu arredor de 200 propostas espalladas por r\u00faas, museos, organismos de I+D e bares das sete principais cidades de Galicia durante a tarde e a noite deste venres. Ademais da UVigo, na G-Night en Galicia est\u00e1n implicadas as universidades de Santiago e A Coru\u00f1a, varios institutos do CSIC (Iegps, IEO, MBG, IIM e Incipit), centros oceanogr\u00e1ficos de Vigo e A Coru\u00f1a do Instituto Espa\u00f1ol de Oceanograf\u00eda e outros centros de investigaci\u00f3n galegos como o Inibic, IDIS, CITMAga, Cesga e Ecobas. A G-Night desenv\u00f3lvese como un evento asociado a un proxecto europeo, empregando os recursos propios das entidades implicadas e co apoio da Xunta de Galicia a trav\u00e9s de Gain, Axencia Galega de Innovaci\u00f3n dependente da Conseller\u00eda de Educaci\u00f3n, Ciencia, Universidades e Formaci\u00f3n Profesional.<\/p>\n