O Centro de Investigación en Tecnoloxías, Enerxía e Procesos Industriais (CINTECX) pechou o ano cun balance que confirma o seu papel como referente na formación de persoal investigador. En 2025 defenderon 14 teses de doutoramento, nove delas con mención internacional, un dato que reflicte a solidez académica do centro e a súa crecente proxección no ámbito científico global.
A aposta pola investigación doutoral forma parte da estratexia de CINTECX para impulsar a innovación, a transferencia de coñecemento e a colaboración con institucións de referencia, tanto en España como no estranxeiro.
Entre as persoas que defenderon a súa tese figuran Rubén Carranza Fernández, Imen Ouiriemmi, Javier Blanco Rodríguez, Andrea Martínez Arcos, César Álvarez Bermúdez e Ksenia Aleksandrovna Lvova, cuxos traballos reforzan a proxección científica e académica do centro.
Recoñecementos ao emprendemento e á Axenda 2030
A Universidade de Vigo distinguiu varias das teses defendidas en CINTECX durante o curso 2024/2025. Javier Blanco Rodríguez, investigador do Grupo de Tecnoloxía Enerxética (GTE), recibiu o Premio de Tese de Doutoramento na categoría de emprendemento por un traballo que deu lugar á creación de Aegis Dynamics, unha plataforma de simulación avanzada para mellorar a eficiencia e a durabilidade de motores e outras aplicacións industriais.
Na mesma categoría, a tese de Alex Alonso Díaz, do grupo GeoTech, tamén foi premiada. A tese de Antía Fernández Sanromán, do grupo BIOSUV, obtivo unha mención e, ademais, o premio á mellor tese en temáticas vinculadas coa Axenda 2030, a Cooperación ao Desenvolvemento e a Responsabilidade Social Corporativa.
Estes recoñecementos consolidan a posición de CINTECX como un centro de referencia en investigación doutoral, capaz de combinar excelencia académica con impacto social e empresarial. A crecente presenza internacional das súas teses e a vinculación cos obxectivos da Axenda 2030 reforzan o seu papel na construción dun futuro máis sostible e innovador.